الهروب من الفريند زون - دليل مختصر-

الهروب من الفريند زون - دليل مختصر-

2015, Aug 12    

بعد هوجة السكرين شوتات الي انتشرت كان لازم حد يضع حد للمهزلة دي ويكتب دليل للهروب من الفريند زون باي شكل.. خصوصاً مع تزايد اعداد البائسين من الشباب من الجنسين علي انهم بيتحطوا في خانة الفريند زون علي طول رغم انهم طيبين.. وكيوت وكدهون.

دي شوية نصايح لعل وعسي يعني..

١- ما تبقاش الشخص الكيوت المثالي او Nice Guy Syndrome

أنت بتحاول بكل شكل انك تصلح الامور.. ما تزعلش الي قدامك لو علي حساب نفسك ، في نفس الوقت مش بتتنيل تاخد اي خطوة او تزمر وتدي اي اشارات..

ازاي تعرف لو انت عندك المتلازمة دي ؟ شخصية لطيفة وصديق كويس منبوذ اجتماعياً وثقة بالنفس صفر معظم صحابه بنات/ معظم صحابها ولاد عنده رهبة الرفض عالية اوي بيحاول يصلح كل حاجة.. بيغطي عيوبه لو حاولت تغير ده ولو مرة او مرتين وكسرت النمط الغبي وزمرت والشخص التاني ما ادكش اي رد فعل ملائم فانت في الغالب خارج دايرة اهتماماته .. انس الموضوع

٢- الحكاك “Needy Baby Greedy Baby”

عارف ايه اكتر حاجة ممكن تقفل حد منك ؟ انك مش بتكون بتدي اشارات انك معجب بيه.. ﻷ انك تكون جايب اوركيسترا بتقول “انا معجب بيك عبر امي!”. انا مقدر شعورك بالاحباط عشان محدش بيعبرك.. بس ده مش معناه انك ترفص زي العيل الصغير .. اهدي كدة وخليك برنس في نفسك الشخص ده مش اخر حد في الكوكب.. خلي افعالك تبين ثقتك في نفسك بدل ضعفك واحتياجك للشخص ده..

٣- تعامل بالايد شوية…

ممكن دي مش مناسبة لكل فئات المجتمع.. عشان في ناس هنا بيديوا بنبوني.. بس نصيحة لو الشخص بيدي بنبوني اهرب بجلدك ربنا كتب لك عمر جديد.. عارف انك تسلم بثقة علي حد … اهم حاجة عشان انا عارف المصريين جلنفات…. حاول ما تبانش متحرش.. يعني سلم.. ناولها الاكل.. لو الاكل لذيذ حاول ما تريلش ليفتكروك كلب سعران.. يعني حنقول ايه صعب نتكلم في تفاصيل اللمس والتعامل باليد .. انا نفسي معوق

٤- صديق عمري

عارف انت تعرفني بقالك كام سنة ؟ السنين كل ما زادت كل ما فرصك اول سواء ولد او بنت انت بتتحط في كادر مختلف عن علاقة رومانسية.. انت في علاقة صداقة.. مهمتك صعبة يا عزيزي..بس الصداقة حلوة بردة :)

٥- علم الغزل… تيرا تيرا تيرارارا

الغزل هنا مرتبط بطريقتين.. طريقة الاستاذ احمد التباع او طريقة كاظم الساهر… عشان كدة شكلكوا بيكون اوفر الغزل بسيط .. ممكن تمتدح البرفان.. اللبس الي لابساه… جزمة شكلها جميل.. خاتم حلو.. الحاجات دي بتفرق عموماً وممكن تقربك

٦- احتاج الناس

عارف لما تقصد حد في خدمة ؟ ده دليل كويس انه يحس ان حد محتاجه.. اطلب مساعدة الطرف الي انت عايز تغير علاقتك بيه لعلاقة رومانسية.. ماتبانش اهبل بردة.. مش حتقوله لو سمحت اربط الجزمة ازاي؟ يعني نبطل وساخة الله يكرمك..

٧- مرتبط

اوعي اوعي اوعي..تكون السبب في كسر ارتباط .. او تقدم علي فعلتك المشينة في الارتباط بها اثناء فترة العياط الشديد التابعة للبريك اب.. الحاجات دي حتعجل في دخولك الفريند زون او في دخولك الاكسات .. حاول تكون سابورتف وتسيب مساحة للشخص يسترجع قواه

٨- انا عايز اللعبة بتاعتي

في ناس لو انت قررت تبعد عشان خلاص هي مش مهتمة فانا حنسي احساسي يقوم الطرف يجيلك ويقولك لا خلاص انا بحبك ؟ اجري اسرع.. مش حينوبك الا وجع القلب .. الشخص مش بيحبك.. هو بيحب فكرة المطاردة دي ..

٩- انا زي الجنية الدهب

خلي حضورك اقل معاهم.. روح قابل ناس تانين وصحاب تانيين حتوحشهم وتلاقيهم بيطلبوا منك يشوفوك عشان وحشتهم الناس ما بتلاحظش قيمة الناس الا في غيابهم وخليهم يشتغلوا علي علاقتك كصديق.. انت مش حتعمل كل حاجة من حقك تزعل ويصالحوك لو عملوا حاجة سخيفة مش حتقول لا مش مشكلة ما زعلتش..

١٠-شايف الوجاهة؟ وجاهة وجاهة!

عارف محدش حيفضلك كشريك لو معفن … نواجه الحقيقة ضوافرك وسخة.. ريحتك تقرف.. التيشرت ده ملبوس ١٢ مرة من غير ما يتغسل.. جزمتك بلون الاسفلت… لابس شبشب او كروكس (لو ب ١٠٠٠ جنيه) اي حاجة من الحاجات دي تقفل اي حد… يعني الكرش ممكن ما يقفلش .. بس الحاجات دي تقفل… ننضف شوية الله يكرمكم انك تكون وسيم ولو شكلك شبه سنوب دوج مش حاجة صعبة.. الهدوم والاهتمام بمنظرك حيفرق كتير وبينيك بشكل احسن

١١-ياعمي انا عايز اطلب ايد ابنك/بنتك

عارف ؟ السؤال بشكل واضح بيكون ناجح في احيان كتير .. اكسر حاجز الخوف وروح كلمه وقوله حقيقة مشاعرك لو انت شايف الوقت مناسب لده او حاسس بانه منجذب ليك بشكل او بأخر.. ما تتاخرش “اصلي ما خلصتش دراسة-اصل عندي جيش- اصل ابويا حامل” الحجج ما بتخلصش والوقت مش في صالحك.

١٢-خلينا صحاب وبس

عارف علاقات الصداقة؟ المشكلة في علاقات الصداقة الي بتتطور بسرعة لصداقة قوية انها لما بتتطور بيروح منها ما يسمي بال “اهتمام بدافع الانجذاب العاطفي” ببساطة لو الشخص الي قدامك مش الي قلناه فوق فيك بشكل واعي او لا واعي وعلاقتك خدت منحني الصداقة .. الارتباط العاطفي بينكم صعب يتغير عند الشخص انت حتفضل صديق وعمر ده ما حيتغير بسهولة… حاول في حاجة اسهل

مصادر

  • Cialdini, R. (2009). Influence: Science and practice. Boston: Allyn and Bacon.
  • Jecker, J., & Landy, D. (1969). Liking a person as function of doing him a favor. Human Relations, 22, 371-378.
  • Waller, W. W., & Hill, R. (1951). The family, a dynamic interpretation. New York: Warner Books. Fisher, H. (2004). Why we love: The nature and chemistry of romantic love. New York: Owl Books.
  • Walster, E., Aronson, V., Abrahams, D., & Rottmann, L. (1966). Importance of physical attractiveness in dating behavior. Journal of Personality and Social Psychology, 4, 508-516.